Assisi tilqa’ eluf ta’ żgħażagħ qabel iż‑żjara tal‑Papa Ljun XIV

Il-belt ta’ Assisi qed tilqa’ eluf ta’ żgħażagħ minn madwar l-Ewropa għall-“GO! Franciscan Youth Meeting”, laqgħa internazzjonali ta’ ispirazzjoni Franġiskana li se tilħaq il-qofol tagħha nhar is-6 ta’ Awwissu biż-żjara pastorali tal-Papa Ljun XIV u ċ-ċelebrazzjoni tal-Quddiesa fil-Bażilika ta’ Santa Maria degli Angeli.

Madwar 2,150 żagħżugħ u żagħżugħa bejn it-18 u t-33 sena qed jieħdu sehem f’erbat ijiem ta’ talb, workshops, riflessjoni u qsim ta’ esperjenzi, ispirati mill-ħajja u l-ispiritwalità ta’ San Franġisk ta’ Assisi. L-attività hija miftuħa wkoll għal żgħażagħ li ma jemmnux, bil-għan li toffri spazju ta’ djalogu u tfittxija għall-verità.

Fra Luca Di Pasquale, wieħed mill-organizzaturi tal-laqgħa, qal lill-media tal-Vatikan li l-akbar tama tagħhom hija li l-Papa jħeġġeġ liż-żgħażagħ “ma jikkuntentawx b’ħajja medjokri” u jkomplu joħolmu “b’affarijiet kbar”. Huwa osserva li llum ħafna żgħażagħ qed jitilfu l-kapaċità li joħolmu u li jsibu skop fil-ħajja, filwaqt li San Franġisk jibqa’ mudell ta’ persuna li qatt ma qatgħet qalbha u dejjem kellha l-kuraġġ toħlom u tirriskja.

Fra Luca Di Pasquale

Nhar s-6 ta’ Awwissu, il-Papa Ljun XIV se jasal fil-Bażilika ta’ Santa Maria degli Angeli, fejn l-ewwel se jieqaf għal mument ta’ talb fil-Portjuncola – il-kappella ċkejkna fejn San Franġisk għex, waqqaf l-Ordni tal-Patrijiet Minuri u temm ħajtu. Wara, se jisma’ mistoqsijiet minn żgħażagħ ġejjin minn diversi pajjiżi Ewropej qabel ma jippresiedi l-Quddiesa fis-Solennità tat-Trasfigurazzjoni tal-Mulej.

Il-programm tal-laqgħa jinkludi workshops dwar il-paċi, il-maħfra, il-vokazzjoni u l-ħajja Nisranija, kif ukoll adorazzjoni Ewkaristika kontinwa, wirjiet dwar San Franġisk u xhieda ta’ persuni li ġabu dawl f’kuntesti ta’ gwerra u tbatija.

Fra Luca enfasizza li l-popolarità ta’ San Franġisk tkompli tikber għax il-messaġġ tiegħu jibqa’ attwali. Skontu, iż-żgħażagħ huma affaxxinati mis-sempliċità tiegħu, mill-imħabba lejn Kristu u mill-fatt li qatt ma waqaf joħlom. Fl-istess ħin, wissa kontra interpretazzjonijiet żbaljati tal-qaddis, filwaqt li spjega li l-Cantico di Frate Sole mhuwiex sempliċement innu għall-ekoloġija, iżda innu ta’ tifħir lil Alla, li fih il-ħolqien juri l-preżenza u l-glorja tal-Ħallieq.

L-organizzaturi jittamaw li dawn il-jiem f’Assisi jgħinu liż-żgħażagħ jiskopru mill-ġdid il-vokazzjoni tagħhom, isaħħu l-fidi tagħhom u jħallu l-belt ta’ San Franġisk b’kuraġġ ġdid biex ikunu xhieda tat-tama fil-komunitajiet tagħhom.