Tħoss li Ħajtek vojta? Il‑Papa għandu kelma għalik.

Il-Papa Ljun XIV wissa kontra il-kultura tal-konsum li, fi kliemu, toħloq bżonnijiet dejjem ġodda mingħajr ma toffri sodisfazzjon veru. Waqt it-talba tal-Angelus fi Pjazza della Libertà f’Castel Gandolfo, il-Papa qal li s-Saltna ta’ Alla ma tnaqqasx mis-sħuħija tal-ħajja tal-bniedem, iżda “tiftaħ il-ħajja” għal orizzonti ġodda.

Fir-riflessjoni tiegħu fuq il-parabboli tal-Evanġelju, il-Papa spjega kif Ġesù jqabbel is-Saltna ta’ Alla ma’ “teżor moħbi” u “ġawhra prezzjuża”, li jistiendnu lill-bniedem jagħraf dak li tassew għandu valur. Huwa enfasizza li l-laqgħa ma’ Alla hija bidla li “ma tirrestrinġix, iżda hija ftuħ tal-ħajja”, għax twassal għal aktar possibbiltajiet u mhux għal inqas.

Il-Papa osserva wkoll li l-Knisja hija magħmula minn persuni differenti fl-oriġini, fil-kultura u fir-responsabbiltajiet tagħhom, iżda kollha huma msejħin biex jingħaqdu fi Kristu, li huwa “t-teżor moħbi, il-ġawhra prezzjuża u x-xibka li tiġbor lil min hu mxerred”. Fakkar ukoll li Alla juri preferenza speċjali lejn dawk iż-żgħar u dawk li s-soċjetà twarrab.

Fl-aħħar tal-katekeżi tiegħu, il-Papa appella biex il-bnedmin jitgħallmu jagħrfu dak li hu tassew importanti. Huwa qal: “Filwaqt li l-industrija tal-konsum tqajjem dejjem bżonnijiet ġodda u mbagħad tagħtina tweġibiet li ma jxebbħux u xi drabi jivvelenaw il-qalb, irridu nitgħallmu nagħrfu t-teżor tar-relazzjoni tagħna ma’ Alla.” Wara l-Angelus, il-Papa sellem ukoll lit-tfal mill-“Casa della Misericordia” ta’ Chortkiv fl-Ukrajna u delegazzjoni tal-Catholic Men Association of Cameroon.